اشتقتلك قد ما في بضيعتنا زهر وعطر
وقد ما في شجر وصخر ..
اشتقتلك قد ما في بالعيون عيون
وقد ما في صمت مجنون ..
اشتقتلك قد ما في بهالضيعة عصافير
تعمل بين النبعة والسما مشاوير
وكلما رندحت ميات العين موال ...
بتعمشق ع نسمة هوا ولعندك بطير ..
اشتقتلك قد ما في بضيعتي ندى
تشتيه نجمات الصبح ..
وقد ما في صدا راجع من مواويل القمح
اشتقتلك قد ما في بضيعتنا كروم
تعصر خمر لسكرات القصدان ..
وقد ما في نجوم ترسم شعر ع زهر الرمان..
اشتقتلك قد ما في بضيعتنا قصص بتنعاد وما بتنعاد
وقد ما بينادي بيي لأمي : يا سعاد
اشتقتلك قد ما في بضيعتنا تفاح بعدو غافي ع الغصون
وقد ما بنتتنا ( لنا ) ضحكت وهي عم تلعب مع زهرات الليمون !!