عيد ميلادها......ابراهيم ياسين

وقت الزمن ختير و نصو مات
و اصفّر خدّو و ضاع منّو اللون

كان الجمال بقمقم الأزمات
محروم من ايد المدد و العون

و مرة وقع عالأرض صبحيّات
و غلّ برواياكي و قطع من هون

و لِم فاق و تبخّر من العتمات
اوّل نفس منِّك.. طلع عالكون



خلقتي..ووراكي اتسكّرو البابين
بوجّ الحلا المن بعدِك تحلّا

و صار النظر يسرح مع العينين
و عن طيفهن ما يعود يتخلّا

و كترة ما حدِّك سبّحو الجدّين
و بيِّك قبالِك..كبّر و صلّا

أول كلامِك كان: يخزي العين
و كلمات ماشاء الله و إسم الله


تخايلت شجرة عيلتِك بالعيد
قبل بزمن ما تصير منخطبة

و الدهر فيها متيّم من بعيد
و شقّة عيونو بالدمع رطبة

و مرة إجا ليها بلا مواعيد
و إسمِك عاكفّو محبس بقطبة

من غصونها مدِّت لصوبو إيد
و لبست بإيدا محبس الخطبة


و بيوم عيدِك رحت صبحيّات
و مشيت عادرب الما إلها رجوع

و صدفة مرقت عامْحل حلويّات
وصّي على قالب بدون شموع

و لو تسأليني... بلهفة الكلمات
ليش الشمع عن قالبِك ممنوع؟

بقلِّك يا روحي ان ولّعو الشمعات
بدِّك تطفّي بنفختين ولوع

و مطرح ما بدهن يوقعو النفخات
هونيك بفزع يمرق السكّين
و يترك بـأنفاسِك نفس مقطوع



و رح أوقف من بعيد.. ما عليكي
و يعيدوكي و غار عاديكي

و كل شي تهاني مشعّلة بوجدان
برجع بلملمهن حواليكي

و لما رح بمدّن جسر شعلان
عالجسر ببعت تهنئة ليكي

بلكي ان مشيِِت عادرب ولعان
بتوصل و هيي دايبة عليكي


و كرمال كفّي الواجب عليي
و أغلى ما عندي جيب عيديّة

لفلفت قلبي بخيط أشواقو
و لْعندِك حملتو عاإيديي

و تبقي عند ما تفرفطي وراقو
و من قلب منّو تطلطلي شويّة

انتي و حالِك بس تتلاقو
روحي لْعند حالك لحتّى اليوم
منِّك..لْحالِك..توصلي هديّة