اللمبة
عصْر التطور طل قلنا مرحبا
وعصْر القديم الكان ولَّى بْلا رجوع
صار السَّهَر يِحلا عا نور الكهربا
مين البيسهر بعد عا نور الشموع
الشمعة
بأنوارك ان كان التطور مكتفي
أشرف إلي عا شمعداني أنطفي
نورِك أشعة بتتعب عيون البشر
ونوري رومانسيي وبساطة وعاطفي
اللمبة
لا تفلسفي الأنوار ما بيهمني
نورك فقير المقدرة ونوري
وهي عادة الشمعة اللي بِخْيام العبيد
تهجي حلا ثريات قصر السلطني
الشمعة
شمعة شرَف تضوي على محبينها
ولا ثرية ذل تحني جبينها
وشمعة طهارة تشِع في معبد صلا
بتسوى ثرياتك مع سلاطينها
اللمبة
عني اسألي بكل المداين والقرى
بتجاوبك بالحق طفلة زغيَّرة
عا بيتنا بيِّي ما بيدخِّل شموع
اللمبة بتسوى مية شمعة منورة
الشمعة
الطفلة الأبوها بالعطف بيزيدها
في عيدها بتكبس عا زر بإيدها
وبينطفو اللمبات عا لحن الفرح
تا يشعشعو شْموع السَّعادي بعيدها
اللمبة
جيلِك فِني وجيلي بَهَر كل الدني
بيتْذكَّروكي بس بالعيد الهني
بْضَوِّي أنا كل السنة ويا معتَّرة
انتي عم تضوي دقيقة بالسني
الشمعة
بضوِّي دقيقة بْفرِّح عيون الجميع
وانتي عم تضوِّي سنة ونورك فظيع
لكن عندما يفل جابي الكهربا
ويقبض مصاري بيلعنوكي عالسريع